Səhər
Qulağımın dibindən nəsə sürətlə vızıldayıb
keçdi. Heç nə olduğuna baxmadım belə. Onsuz da yay gecəsi yatmağa qoymayan
ağcaqanadlar kimi güllələrin sürü ilə başımızın üstündən sıvışıb keçməsi adi
hadisə idi. Xüsusilə də belə bir gecə də… Dünəndən, ya da birisigündən, bəlkə də
ondan əvvəlki gündən bəri davam edən atışma elə adi hal almışdı ki, nə vaxt bu
işıqlı vızıltılardan qorxmaqdan əl çəkdiyimi xatırlamıram belə. Yenə də hər
ehtimala qarşı şilemi gözlərimin üstünə basdım. Üzümə bir kölgə düşdü. Əlimin
kölgəsi. Kölgə? Işıq haradaydı axı? Belə vaxtlarda işıq heç vaxt yaxşı şey
deyildi. Qaranlıq sənin dostundu. O səni gizlədir, qoruyur, görünməz edir. Nə qədər
kəskin nişançı olursa olsun, qarşı tərəf güllələri kor-koranə atır. Çünki
qaranlıqdır, gecədir…
Ah, gecə bitib. Gözlərimin düz qarşısındaki
təpələrin üstü alov-alov yanır. Yox, bu oda verilmiş kənd deyil, ya da
bombalardan alov almış ağaclar. Heç yanan canlı-qanlı insan deyil. Elə olsaydı
dəhşətlə çığırardı,
çabalayardı, sanki kimsə ona kömək edə bilərmiş kimi köməyə çağırardı. Bilirəm,
görmüşəm. Təpələri “yandıran” günəş idi.
Sarı, qırmızı, narıncı – gözəl rənglərdir. Bunlardan birini əvvəllər çox
sevirdim. Amma burada o qədər gördüm ki… Yox, günəşdə olanlar gördüyüm rənglər
deyildi. Sarı –səngərin digər tərəfindən yağış kimi yağan güllələrin izi olan
sarıya bənzəmirdi. Narıncı – gözlərimizin özündə yanan hər şeyin alovundakı
narıncıya bənzəmirdi. Qırmızı – eh, bu qırmızını necə axan, yapışqan, yarı metalik,
yarı çiy ət qoxusu verən “qırmızı” ilə müqayisə etmək olar axı?. Günəşin rəngləri
çox fərqli idi. Heç görmədiyim rənglər… Yox, yox, görmüşəm! Ax, əlbəttə, çox
görmüşəm. Eynidir. Bundan, buradan əvvəlki həyatımda . Özüdür ki, var! Sadəcə təsəvvür
et ki, vızıldayan güllələr əvəzinə civildəşən səhər quşları, nəmli, barıt
qoxusu verən torpaq əvəzinə yumuşaq çarpayı var. Günəş də arxasında darmadağın
olmuş kəndlər olan təpələr əvəzinə pəncərənin pərdə arasından sənə boylanır.
Bax, yenə gözlərimi qamaşdırır, oyanmağa çağırır. İstəmirəm. niyə oyanım axı?
Onsuz da bir azdan anam çağıracaq. Məktəbə gecikdiyimi deyəcək, qapını döymədən
otağıma girib dünən allah bilir harada çıxardığım paltarlarımı axtara-axtara
deyinəcək.
-
Bir
az daha yatmaq istəyirəm…
Yollara tökülüşən nadinc uşaqların
çığırtısı… Yox, bu çığırtı başqadır. Başımı sola çevirdim. Çığıran “ağcaqanad”ın dişlədiyi şiləmi kənara
uçmuş xaki paltarlı böyük adam idi. Çığırtısı başladığı imi də kəsdi. Özünü
arxaya- səngərin dibinə atdı. O qədər sürətli oldu ki, heç üzünü yaxşı görə
bilmədim də. amma deyəəsn tanış gəlirdi. Tanıyırdım, uzun müddətdir tanıyırdım
axı onu. Adı nə idi? Hə, Əhməd. Onun da
yuxusu gəlib deyəsən. Gicgahından yarı metalik, yarı çiy ət qoxusu verən
qırmızı axa-axa yatır.
Mən də yatmaq istəyirəm.
Silahimi daha bərk sinəmə sıxdım. Hə, tətiyi
çək, görüm! Belə gözəl sübh çağı?... Yox, aldanma! Gözlərini qamaşdıran günəşə
fikir vermə, sola baxma, o qoxunu içinə çəkmə, tətiyi çək! Bilirsən axı, bir dəfə
çəkəndən sonra arxası çox asandır. Lap uşaq vaxtı kəndə odun kəsməyə gələn əminin
elektrikli mişarı kimidi. Bircə dəfə ipi çəkəndən, işə düşəndən sonra dayanmaz,
dayanması mümkün deyil. Hə, hə, bilirsən, çətini ilk gülləni atanacandır. Dəfələrlə
etmisən axı.
Bir az daha yatmaq istəyirəm…!
Gurultuya yaman diksindim. Əlimdəki avtomatdan
belə gurultu çıxa bilməz, yoxsa
qulaqlarım yenə küyə düşüb? Bu nə səsdir,
uğultudur, səssizilikdir, hissizlikdir… Gözlərimin qabağındakı günəş toz buludu
arxasında yox oldu. Eynilə yaz səhərləri yorğanı başıma çəkəndə olduğu kimi…
İsti yataq, bədənini çulğayan şirin səhər
yuxusu, otağına dolan, gözlərini yandıran sübh günəşi. Ondan qaçmaq üçün üstümə
çəkdiyim qalın yorğan… Qalın, barıt və yarı metal, yarı çiy ət qoxusu verən nəmli
yorğan. Bütün bədənimi örtən, isidən, məni işıqdan, səsdən, açılan yeni səhərdən,
oyanmaqdan – günəşdən qoruyan qalın yorğan. Yamanca yuğum gəlir, lap gözlərim
yumulur.
Hə, mən bir az daha yatmaq istəyirəm… Yatmaq
istəyirəm!
*****
Oyanmaq istəyirəm…
Son
Hiç yorum yok: