Portret
"Qonşu evin işıqları" kitabından...
Tənhalığın portreti
Onu ilk
gördüyümdə işıqlı salonun ortasında bir rəsmin qarşısında dayanmışdı. Kənardan
diqqəti cəlb edəcək biri deyildi: orta boy, qısa qara saçlar, adi, bəyaz don,
ona uyğun sadə ayaqqabılar. Yaxınlaşdıqca üzünün də o qədər gözəl olmadığını
gördüm. Hər şeyi ilə sadə və adi idi. Amma qarşısında dayanan rəsm ilə təzad təşkil
edirdi – divarı işğal edən iri çərçivə və içindəki qaranlıq... Qarşısında
dayanan qadının bəyaz əlbisəsi ilə uyğunsuz idi ki, mənim diqqətimi çəkən də bu
idi. Qara və ağ.
-
Tablonu bəyəndiniz?
-
Yox.
Təəccübləndim.
Mənə cavab verəndə belə nəzərlərini ayırmadığı bu tablonu bəyənməmişdi? Düzdür,
sərgidəki ən gözəl əsər deyildi, lakin bir “yox”a da layiq olamalı idi. Marağım
güc gəldi, soruşdum:
-
Niyə?
-
Çox bədbindir.
-
Hə, qara rəng. – başımı yellədim.
Ilk dəfə
üzünü çevirib mənə baxdı. Təzədən tabloya qayıdıb asta səslə dedi:
-
Bu qara deyil. Bu rəngarəngdir.
-
Necə? – inanmayıb, diqqətlə tabloya
baxdım. Bir müddət gözlərimi zilləyəndən sonra həqiqətən da qaranlığın içində rəngarəng
ləkələr olduğunu gördüm. Təsdiqlədim – Hə, doğurdan da rəngarəngdir ki! Görəsən,
bu nəyin rəsmidir belə?
-
Tənhalığın portreti.
-
Nə?! Niyə belə düşünürsünüz?
Qadın tərəddüd
içində qalmışdı. Bunu barmaqlarını əsəbi-əsəbi oynatmasından anlamaq olardı.
Axır ki, bir qərara gəlib dərindən nəfəs aldı. Gözlərini tablodan ayırmadan
danışmağa başladı:
-
Bu gözlərini bərk-bərk yumduğunda
gördüyümüz şeydir. Hər dəfəsində yox, sadəcə xüsusi hallarda. Tək olanda,
gücsüz olanda, qorxanda, kədərli olanda, tənha olanda...özümüzü tənha hiss edəndə
bir küncə qısılırıq, gözlərimizi bərk-bərk yumuruq, bəzən dua edir, bəzən
ağlayır, bəzən də qorxudan titrəyirik. Amma gözlərimizi açmırıq. Hər şeyin keçməsi,
bütün olanların bitməsi üçün açmırıq. Sanki, gözlərimizi nə qədər bərk yumsaq o
qədər uzaq olarıq, o qədər uzağa qaçarıq. O qədər sıxırıq ki, gözlərimizi
ağrımağa başlayır. Ağrıdan sonra rənglər gəlir, daha çox qırmızı. Rəqs edirlər.
Qaçışırlar. Qaranlığın içində gözlərimizlə onları tutmağa çalışırıq... Onları
görmək üçün səssizlik lazımdır, qaranlıq lazımdır, təklik lazımdır. Məncə, tənhalıq
elə bu rənglərdədir. Çünki, onları görmək üçün həqiqətən tənha olmaq lazımdır.
Ona görə də, bu, tənhalığın portretidir.
Dinmədim. Təkcə
gözlərimi bərk-bərk yumdum. Öncə bütün səsləri eşitməyə başladım: topuqlu
ayaqqabıların taqqıltısı, adamların danışığı, səssiz fısıltılar. Içəridəki ağır
havadan kəsif boya iyini və müxtəlif ətirləri
ayırmağa başladım. Üzərimdəki paltarın ağırlığını, hətta dərimdən sürünüb keçən
havanı belə hiss etdim. Sonrası isə qaranlıq... Qaranlığın içində süzülən rənglər.
Onların qaçışması... Ətrafımdaki hər şəyin bir-bir yoxa çıxdığını hiss etdim. Digər
bütün duyğularım iflic olmuş kimi tək gördüyüm, hiss etdiyim o qara parçanın üzərinə
sıçradılmış rəng paleti kimi görünən mənzərə idi. Tək hiss etdiyim... Tək hiss
edə bildiyim... Hə, mən tənha idim. Elə bir tənha ki, nə əllərim çatırdı, nə səsim
yetirdi, nə də dərk edə bilirdim. Elə bir tənha ki, tənhalığı belə ilk dəfə dərk
edirdim. Hə, mən belə qalmaq istəyirdim. Bu keçənə qədər belə qalmaq istəyirdim...
Bir də
gözlərimi açanda onları nə qədər bərk sıxdığımın fərqinə vardım. Belə ki, gözlərimdəki
bulanıq pərdənin götürülməsi üçün gözlərimi ovuşdurmalı oldum. Artıq hər şeyi təmiz
görməyə başlayanda ilk gördüyüm qarşımdaki tablo oldu. Cəld nəzərlərimi başqa tərəfə
çevirdim. Həmin qadın artıq yanımda yox idi. kim bilir neçə vaxtdır gözüyumulu
dayanmışam. Qıraqdan görənlər yəqin “dəlidi ki, bu adam” deyiblər. Başımı yelləyib
özüm öz axmaqlığıma gülümsədim – bir işə bax ha, adi bir tablonun qabağında ayaqüstü yatmaq! Təbəssümüm
öz-özünə yarandığı kimi, öz özünə də silindi. Çiyinlərimdə ağırlıq hiss
edirdim, hətta, bu ağırlığın altında əzilirdim! Çevrilib tabloya axrıncı dəfə
baxdım. Hə, əsil tənhalığı portretidir ki, var! Dünyanın ən tənha adamı isə bu
tablonu çəkən yox, bunu alan adam olacaq. Öz tənhalığını satın almaq...!
Qarşısına keçib, hər gün, hər gün öz tənhalığına baxmaq...!
Dünyanın ən
tənha adamına yazığım gəlir.
Başqa birinin gəlib arxamda yanımda
dayandığını hiss etdim. Orta yaşlı bir kişi səsi gəldi:
-
Qəribə tablodur. Nədir bu belə?
-
Tənhalığın portreti. – özümdə bilmirəm
niyə bunu dedim...
Son.
Hiç yorum yok: